عاقل و منفعل

عيش حياتك و إخلع مساميرك !

عايزك تجيب كيس زباله حلو كده و كبير و تعالى اقعد جنبي و قولي ............

إيه إللي مضايقك يا أخي؟

مراتك مطلعه عينك و هارياك مشاكل ليل نهار هيا و العيال ؟

طلّلع مسمارهم من دماغك يا أخي و أقعد اتفرج على نانسي و هيفاء و إشرب نسكافيه ولا يهمك

سيبلها البيت و إطلع إسهر مع إصحابك و إضحك و روِّش و عيش حياتك

إيه تاني؟

مديرك ف الشغل ولا زمايلك بيضايقوك و ضاغطين على أعصابك ؟؟

ناولني المسمار دا كمان........أهو رميتهولك ف الزباله

إهتم بشغلك بس عشان دا أكل عيشك و إللي بيخليك تخدم الناس و تكون إنسان مُنتج و هوا المكان الوحيد إللي

بيديك فلوس تعيشك و تعيش عيلتك لكن أي مضايقه فيه إرميها ورا ظهرك و إنساها أول ما تطلع منه

ها.......قولي إيه تاني مضايقك؟

بتحب واحده مطلعه عينك و عايشه ف الدور ؟؟

هاااااااات أم المسمار دا عارفه رزل و تخين..أااااااااااااهوه يا سيدي ولا تزعل نفسك

إدلقها و طلع مسمارها من قلبك و إشتري دماغك

بكره تلاقي إللي تقدرك و تشاركك همومك و أفراحك و تحبك بجد مش تحب نفسها بس !

قولي متنكسفش...........إيه تاني مزعلك كده و جايبلك إحباط ؟

الفلوس مزنقه معاك و عايز تجيب حاجات ضروريه كتير ؟؟..................ماشي

أفتكر كيس الزباله لسه فيه مكان

سهله قوي قولي كده إنتا محتاج الفلوس تعمل بيها ايه؟

شقه؟............يا سيدي أجَر شقه قانون جديد بدل التمليك

عربيه ؟..........إسألني أنا عن العربيات و أرفها و من الميكانيكي للكهربائي لبتاع العفشه يا قلبي لا تحزن

الله يرحم أيام المشي و الأتوبيسات و التاكسيات لو العمليه منعنشعه

عايز تصيف؟

و مالو ......روح يا سيدي جمصه ولا يومين ف الإسماعيليه أو فايد مش لازم المعموره يعني !

عايز تاخد كورس كمبيوتر ؟

دا الكورسات دلوقت بقت على قفا مين يشيل و ب 30 جنيه ولا يكون عندك فكره

ها..........قولي بس مالك كئيب ليه كده ؟...إيه تاني مضايقك ف حياتك ؟؟

مش لاقي شغل أصلاً ؟..............بسيطه قوي يا أخي خضتني !

هات المسمار دا صغنن كده و لذيذ....إرمي في الزباله ونا أقولك تعمل إيه !

غير التدوير على الشركات ممكن قوي تفتح النت ساعه بإتنين جنيه ف أي سيبر و مواقع العمل بقت متعدش

إعمل C.V محترمه كده و جذابه و حطها على فلاش ولا CD و إديها بقى...إبعتها لأمه لا إله إلا الله فاكسات و إيميلات و إن شاء الله ربنا هيوفقك

إنسى يا أخي إنسى و ريح بالك........و عيش حياتك بأه...إنتا هتعيش كام مره بس قولي دي هيا مره واحده!

المسامير

06/ 7/2008

،

12:58 م

.. من قبل ameera1977

أخي الكريم حازم
كل المسامير اللي اتكلمت عليها صعب تتخلع وحتى لو اتخلعت بتدق في النافوخ تاني لوحدها
كيس الزبالة اللي قلت عليه مايكفيش كل المسامير
ياريت كانت الحياه سهلة كده

تقبل مروري

أهو........بنحاول

06/ 7/2008

،

03:28 م

.. من قبل lastdinner

أختي أميره
أهو بنحاول نبسطها
كل شيء أصله بسيط لكن إحنا إللي أطماعنا كتيره !

بس بلاش حكاية نانسى وهيفا

06/ 7/2008

،

05:35 م

.. من قبل fadiabatisha

رائع يا حازم

كتابة متفائلة تسعد القلب

وياريت كلنا نحاول نبسطها شوية

ولك اخى الكريم كل التقدير

فادية

شكرا فاديه

06/ 7/2008

،

08:01 م

.. من قبل lastdinner

أشكر مرورك و يارب تكوني متفائله على طول

انوثه

06/11/2008

،

10:29 م

.. من قبل Anonymous

ممكن ندق مساميربس عقلنا نوديه فين
كده هيكون نوع من الا مبالاه لازم نفكر في
مشكلنا نحاول نحلها مش نهرب منها لا يمنع
وجودنا في مكان نريح نفسنا ايام ونرجع نخطط
لحياتنا تاني حازم تمنياتي لك بكل السعاده والهناء
الموضوع حلو اويي ارق امنياتي ....

أرسل تعليق
من:	*  عضو مسجل: [ دخول / التسجيل ]
* عنوان الموقع:
* البريد الإلكتروني:
الموضوع:
* النص:
* الرمز: