عاقل و منفعل

الإضراب و كشف الضباب !

الحقيقه رغم إن الإضراب في 4 مايو و 6 أبريل أثاروا مشاعري لكن مقدرتش أعبّر عنه وقتها لأني كنت سعيد بيه و كنت بتأمله و أفكر فيه

هل فعلا يا جدعان الشعب المصري مامتش؟؟

إنتو عارفين أنا كنت دايماً أهزر و أقول توظيف الأموال نهبنا و نواب القروض و المخدرات قشّطونا و الأسعار عمّاله تغلي و الحكومه عمّاله تسرق و الريس كابس علي نفسنا و إبنه جاي يكمّل علينا و يورثنا.......كل دا و الشعب فين ؟؟ عارفين الشعب فييين؟؟..............في الحمام جايز أو راحت عليه نومه ! 

للدرجه دي كنت فاقد الأمل في الناس......فين الناس ؟....ليه مابتتكلمش؟.....ليه مابتعبرش؟؟؟ 

يانهار إسود يا جدعان !....دا نيجريا و السودان و اليمن بقي عندهم إنتخاب و ديموقراطيه و أكتر من ريس مُرشّح من قبلنا و مجلس شعب حقيقي مش هتيّفه ولا صقيّفه !........يعني لا بنقول أمريكا ولا أوربا !

دا قطر بقي عندهم قناه الجزيره ، قناه بتنقل الأخبار حقيقيه مش ملونه بألوان الحكومه و الريس و التعليمات و الأمن القومي و الكلام الفاضي إللي مسح عقول الناس و عمل ضباب علي كل المعلومات إللي المفروض توصلهم ! ، قناه بتنقل الخبر حسب أهميته الحقيقيه مش عشان بتاع الريس أو الحكومه !

يا جدعان دا البلاد العربيه بقي فيها مظاهرات عشان الغلاء و عشان تعيين وزير حرامي أو عشان مسئول خد رشوه !

برضه لا بنقول أوربا ولا أمريكا !

الله !........أومال إحنا ساكتين ليه؟.......خاضعين ليه؟؟.........خايفين من إيه؟؟

إقتصادنا تحت الأرض و خدنا صفر في الرياضه و في السياسه بناخد علي قفانا و المصري أكتر واحد متهان و ممسوح بيه الأرض في البلاد العربيه !

باقيين علي إيه؟.........و خانعين لمين ؟.........و هيعملولنا إيه أكتر من الوكسه إللي إحنا فيها ؟؟

أنا فرحان بالإضراب و مع الإضراب و مع أي إضراب أو مظاهره ضد الحكومه و ضد الفساد و ضد الغلا و ضد التوريث

مش مهم الناس زعلانه من إيه ولا بتقول إيه ولا بتعمل إيه !

المهم إن الناس لسه واعيه و لسه فيها الروح..........و ياروح مابعدك روح

و الحمدلله إن الشعب صحي من النوم.......و طلع من الحمّام !                                            

الحمد لله

05/14/2008

،

09:49 م

.. من قبل fadiabatisha

شعب مصر يصبر لكنه فاهم جدا

الشعب المصرى هو انا وانت

كلنا نعبر عن مصرنا الغالية

سرقونا ؟
صح
نهبونا؟
حصل
كبسوا على انفسنا ؟

ونفس جمال يكمل علينا ؟

صح الصح ؟

لكن الناس تحركت مع اختفاء العيش

تحركت وستتكرك وربنا لايرضى بالظلم

ولك كل التقدير على المدونة القيمة

فادية

لك كل الاحترام

05/14/2008

،

10:34 م

.. من قبل ameera1977

اشكرك على موضوعك الذي يهم ملايين البشر
وايضا على جرأتك في الحديث

ونتمنى ان يكون التغيير بيد الملايين قريبا ان شاء الله

الشعب مكانش ف الحمام

05/14/2008

،

11:27 م

.. من قبل masryeen

يا عم حازم
الشعب كان في طابور العيش
انت مكنتش معاهم ولا ايه
وفروا لنا الاكل نتظاهر
............................................
تحياتي

ما انت فيك دماغ شغاله

05/15/2008

،

02:14 ص

.. من قبل onotha

انا كمان معاك ف الاضراب لكن حكومتنا ذكيه سيطرت ع الموضوع كله لكن لسه فينا نفس نقول لا يمكن يكون فيه امل ..
سؤال هو كان فين سامح في الاضراب بلتوفيق

أرسل تعليق
من:	*  عضو مسجل: [ دخول / التسجيل ]
* عنوان الموقع:
* البريد الإلكتروني:
الموضوع:
* النص:
* الرمز: