عاقل و منفعل

كانت مفاجأه غريبه و قاسيه جداً بالنسبه لي لما شوفت إعلان مسرحيه "مرسي عاوز كرسي" بطوله أحمد بدير و حواليه البنات بيتنططوا و لمحت ف وسطهم ريهام سعيد !

يانهار أبيض !........مش دي ريهام سعيد مذيعه برنامج "صبايا" على قناه المحور يا جدعان !!

أيوا هيا !........لابسه المحزق و الملزق و الملمّع و المترتر وهات يا رقص و هزّ !

هيا دي المذيعه إللي كل حلقاتها في برنامج "صبابا" عن الأدب و الأخلاق المفقوده و العوده للأصول !

هيا دي المذيعه إللي ناقشت مفهوم الرجوله المتناقص ف الأيام دي !

هيا دي المذيعه إللي كانت هتبكي ف حلقه الشاب محمد الشرقاوي إللي عاوز يحترف الرقص الشرقي !

هيا دي المذيعه إللي مرمطت ب بوسي سمير الأرض على كليباتها الخليعه و خصوصاً كليب ليله الدخله و قالتلها إن إرتفاع ثمن تذاكر حفلاتها لا يعبر عن حب الناس لفنها و إنما حبهم لجسدها !

هيا دي المذيعه إللي خلتني أفكر إن مش كل واحده جميله لازم يكون ليها نصيب في بئر الغرور و التباهي و المسخره!

دي المذيعه إللي كانول الناس بيكلموها من كتر كلامها عن الأخلاقيات و ينصحوها بالحجاب عشان كلامها يقترن بفعلها ، و كانت ترد عليهم بإبتسامه جميله و صوت رقيق و تقولهم "إن شاء الله قريب" !

دي المذيعه إللي خلت الناس تثق بإن مش كل واحده حلوه لازم تبقى بائعه هوى إنما ممكن يكون ليها شخصيتها و قيمها و مبادئها و ممكن تعتمد على ثقافتها و عقلها مش بس على جمالها و إغرائها !!

بعد كل دا و تسيب كل دا و تروح تترقص و تتعرى مع مرسي ع الكرسي !

ليه كده يا ريهام؟؟

الحظ حليفك !

07/24/2008

09:33 م

.. التعليقات 0

الحظ شيء أساسي بالحياه مفيش شك !

ناس تسميه بخت و ناس تسميه نصيب و ناس تسميه قَدر و ناس تسميه توفيق ربنا

مش مشكله التسميه لكن الأهم إنه بإعتراف كل الناس "موجود" و أساسي في الحياه

طب إيه هوا الحظ و هل ليه مقدمات أو لأ؟

الحظ هو إجتماع ظروف معينه غير محسوبه ف لحظه معينه غير متوقعه يكون ليها تأثير مباشر عليك سواء التأثير دا كان إيجابي أو سلبي ..............إزاي ؟؟

يعني لعيب الكره لو شاط الكره خبطت ف لاعب تاني و دخلت جون يبقى حظه حلو لأن ظروف الشوطه مع ظروف وقوف اللاعب في طريق الكره خدمته و لو جت في اللاعب دا نفسه دا و طلعت بره يبقى حظه وحش لنفس الأسباب السابقه

طب حلو قوي........أومال إيه مقدمات الحظ بأه لما الموضوع كده ؟

لو تأملنا ي نفس المثال السابق نلاقي إن عشان الحظ يخدم أو ما يخدمش لازم إللي شاط الكره يكون لاعب كره أصلاً !

يعني تعب و إتدرب و راح نادي و إتنين و إكتسب خبره و هكذا

يعني مش واحد ماشي في الشارع كده هيقوم داخل الإستاد و نازل لاعب مع الفريق الوطني و ربنا يوفقه يقوم يشوط و يجيب جون !

ولا ممكن الحظ يحالف مهندس دخل المستشفى يقوم يعمل عمليه كبد لواحد و تنجح !

ولا الحظ لما يآتي يخلي الأعمي ساعاتي بأه ولا حاجه !

و الأمثله على كده كتير قوي

نيوتن إللي إكتشف الجاذبيه بتفاحه وقعت على دماغه لو ماكنش عقله فكر في الموضوع مكنش إكتشف الجاذبيه و أتبعها بمئات الإختراعات في شتي ميادين الطبيعه و كان أكل التفاحه و خلاص زي ما أي واحد ممكن يعمل !

جيمس وات لو ماكنش عمّال يفكر في إختراع المحرك ماكنش شغل باله لما شاف غطاء الحله عمّال يترجرج من البخار لما غليت الميه فيها و قدر يستفيد من الطاقه البخاريه و عملنا المحرك البخاري !

نجيب سويرس لو ماكنش بيفكر في شبكه الإتصالات المصريه و أخد المخاطره بإنشاء أول شبكه ماكنش الحظ خدمه و بقى من أغنى أغنياء العالم !

الأمثله كتير و لا حصرلها و كلها بتدل على شيء واحد

إن الحظ موجود صحيح.........لكن بيحالف مين و لا يحالف مين؟

بيحالف الشخص إللي يتعب و يعمل و يكون عنده قضيه و فكر في دماغه شاغله ، يقوم لما يلاقى الحظ يعرف إنه حظ ، يستغله زي جيمس وات ، أو الحظ يجيله يقوم يفكر فيه و يستفاد منه زي نيوتن ، أو يخاطر بحساباته و الحظ يساعده زي سويرس !

يعني ف كل الأحوال لازم يكون في بناء للشخص و إمكانياته أولاً

تعب و مثابره لإكتساب الخبرات ثانياً

قضيه تشغل عقله لإستغلال الحظ عندما يأتي ثالثاً

طب كويس.......إنما لو الحظ ماجاش ؟؟ أو دايماً "حظك وحش و نحس " زي ما بتحاول توهم نفسك ؟؟

مفيش واحد في الكون كله ما بتجلهوش فرصه...........و لو عندك واحد ياريت تكتبلي إسمه !

إنما الشاطر إللي يستغل الفرصه دي.......يبقى متقولش الحظ مش هييجي !

و مفيش واحد حظه وحش على طول في كل حاجه

لأنه ببساطه لو كان كده يبقى مش عايز يتعب.........إزاي ؟

عايز تقنعني إن ممكن لعيب كوره يشوط عشر مرات على الجون و تطلع بره ؟

ممكن.......لو كان دا لعيب مش عايز يتدرب ...........أو مش لعيب كوره أصلاً بأه !

لكن اللعيب الحقيقي لو الحظ عانده مره مش هايعانده التاني ولا التالته !.............صح؟؟

يبقى الحظ مهم ..........و موجود..........و معاك..........لو كنت مستعد له !

أسرى حزب الله المُحررين و الأسرى المصريين المهدور دمائهم !

07/16/2008

08:55 م

.. التعليقات 0

في مشهد دراماتيكي مُهيب شاهدت اليوم عمليه إستبدال خمسه أسرى أحياء لبنايين بينهم سمير القنطّار الذى أمضى بالسجون الإسرائيليه ثلاثين عاماً ! بالإضافه إلي رُفات مئات الشهداء اللبنايين و الفلسطينيين و العرب ، و ذلك مُقابل رُفات إثنان من الجنود الإسرائليين !

كيف إستطاع حزب الله الباسل و قيادته الحكيمه تطويع و تركيع و إذلال الأنف الإسرائيلي القذر و دسّها بالتراب ؟

كيف إستطاع ذلك الحزب و جنوده الباسلين و قيادته الصبوره المؤمنه أن تسترجع خمسه أحياء بينهم أسير أمضى ثلاثون عاماً بالسجون الإسرائيليه و إضافه إلى ذلك تسترجع تلك القياده مئات الرفات من الأجساد العربيه الشهيده الطاهره ؟

كيف إستطاع حزب الله أن يفعل مالم يستطع فعله بلاداً عربيه لها موازناتها و جيوشها و قياداتها المُستقله ؟؟

كيف لم يُزعن ذلك الحزب و تلك القياده المؤمنه الأسطوريه للخرافه الإسرائيليه و الأمريكيه ؟

كيف لم يُلقي ذلك الحزب و قيادته الشريفه سلاحه و شرفه هلعاً من الجيش الإسرائيلي الذي لا يُقهر !

و لا طمعاً في منصب أو جاه أو مال أمريكي مُدنس بدماء أخوته العرب و شهداء القضيه الفلسطينيه ؟

إنه الإيمان بالله و بالمباديء و بالقضيه

إنه الإيمان بالنفس و عفّه اليد و طهاره الروح

و إنظروا إلي القيادات العربيه الجوفاء البلاستيكيه الطامعه بالمناصب و إلي الرضا الإسرائيلي و إلي الكعكه الأمريكيه !

إنظروا إلي الشعوب العربيه الخائبه الخائفه من قياداتها الذليله و من الخُرافه الإسر ائيليه الأمريكيه !

إنظروا كيف تعامل حزب الله مع اسراه الأحياء و رُفات أسراه الشهداء و كيف تعاملت مصر و قيادتها الفاشله الطامعه مع قضيه اسرانا بحرب 67 !

إنظروا إلي التعامل مع القضيه الوطنيه من قياده حره و ذلك التعامل من قياده ذليله راكعه طامعه بالمنصب !

إنظروا كيف لم ينبس رئيس أو ملك عربي ذليل واحد ببنت شفه مع إنتصار حزب الله و قائده حسن نصر الله !

إنظروا كيف تحاول تلك الحكومات للقيادات العربيه الذليله أن تقلل من كل إنتصار لحزب الله و قيادته بالتشكيك في وطنيته و ماهيه إسلامه !

و مالنا نحن إن كان سُنياً أو شيعياً ؟...........فليحاسبه الله على قلبه

إنما يهمنا نحن دفاعه عن قضيه إخواننا بفلسطين و طهاره نفسه و قلبه و يده و إعتزازه بكرامته

يا أيها الرئيس المصري الذليل ........إن كنت لا تستطيع محاسبه إسرائيل على ما فعلته بأسرانا في حرب 67 فأوكل حسن نصرالله -إن وافق- أن يدافع لك عن قضيتنا ووراءه جموع الشعب المصري الباسل بإذن الله

خسروا الحلال و لم يكسبوا حتى الحرام !

07/13/2008

08:02 م

.. التعليقات 6

شيء غريب جدا بشوفه على موقع ال U Tube !

بنات و ستات المفروض انهم "محترمات" متزوجات في بيوت أزواجهم أو بنات بعمر الزهور في بيوت أهاليهم عمّالين هات يا رقص و هز و عرّي و حد بيصورهم على الموبيل و بعدين ينشرلهم الفيديوهات دي على موقع نت من أشهر المواقع و أوسعها إنتشاراً عشان اللي ما يشتري يتفرج !

بعلم البنات أو الستات "المحترمات" دول .........الله أعلم !

طبعاً فيّ إفتكسات و في إستنتاجات في التعليقات حتى اللي بتتكتب على الكليب دا

إن لو الواحده مش "واخده" خوانه و بترقص على راحتها بتبان

و لو بتحاول تخفي وشها تبقى عارفه ان الكليب دا هيتنشر و هكذا

لكن بجميع الأحوال البنات و الستات دول عارفين انهم بيتصوروا و دا واضح جدا من نظرتهم للكاميرا و أخادنهم لبوظات و أوضاع ساخنه كمان قدامها !

و مين اللي بيصور البنات و الستات دول ؟؟

بالتأكيد حد قريب منهم لأننا بنتكلم عن تصوير في البيوت بالموبيلات مش تصوير لمحترفات هايروحلهم مخرج أو مصوّر !

حد من أهل بيتها سواء راجل أو ست ، صاحبها أو صاحبتها............إلخ

الأغرب إنك تلاحظ في بعض الفيديوهات دي إن ناس من "أهل" البيت قاعدين و الرقص و التصوير بالموبيل أو الكاميرا شغّال و همّا بيتفرجوا!!

ممكن كمان تلاحظ إن بعض الكليبات متصوره بغرف نوم متواضعه جدا و الست اللي بترقص بتكون بترقص بكل حب و رومانسيه لدرجه إن يجيلك إحساس إنها بترقص لجوزها إللي هوا بيصورها أكيد !

طبعا ممكن تكون منحرفه و بترقص لعشيقها

و ممكن يكون حد غرر بيها و نشر الفيديو دا بدون علمها

طب الموضوع دا متعمد ولا لأ ؟

هل هوا متعمد من البنات و الستات دول إنهم يتصوروا و هما عارفين أن الكليبات دي هتتنشر ؟

هل عارفين إنهم بيتصوروا على سبيل" التهريج" و بعدين "الأشرار" اللي بيصوروهم بيغرروا بيهم؟

هل الموضوع تهريج و مفيش حتى نيه للي بيصور إنه ينشر و لا حاجه لكن الكليب بيلقطه حد من موبيله و ينشره ؟

كل دا ممكن

لكن في جميع الأحوال البنات و الستات دول عارفين انهم بيتصوروا و إللي دفعهم لكده غرورهم بجمالهم و إحساسهم إنهم "أحسن من دينا و فيفي عبده و سهير زكي ف زمانها ، و إنهم لو إشتغلوا رقاصات هيكسبوا دهب ! "

مره واحده ظاهرها محترم و ذات مركز إجتماعي و ذات جمال فتّان قالتلي كده حرفياً "أنا لو سبتني من شغلي دا و إشتغلت رقاصه هكسب دهب ! "

يعني إيه ؟

يعني الرقاصات المحترفات بالرغم إنهم رقاصات علني لكن خدوا قرارهم في الحياه حتى لو كان القرار دا غلط

لكن البنات و الستات دول بيتمرجحوا بين الصح و الغلط بدون ما يقدروا ياخدوا قرار !

أكون جميله و محترمه و عايشه عيشه بسيطه و ربنا مبارك وساتر عليا و محدش داريان بيا

و لا مش مقتنعه بالعيشه دي و لازم أظهر جمالي للناس عشان يعرفوا إني مش أي كلام و أرضي غروري !

و بين الصح و الغلط ركبوا المرجيحه !

خسروا حلالهم و ستر ربهم .................و ما كسبوش حتي حرام الرقاصه المحترفه !

البطاله ....كنز لا يفني !

07/ 1/2008

11:32 م

.. التعليقات 0

07/ 1/2008 ، 07:04 م .. التعليقات 6 .. الرابط

البطاله أو العطاله طبعاً هي عدم الشغل أو الفراغ أو حتى الشغل بدون وجود عمل حقيقي أو مسؤليات حقيقيه و هيا إللي بيسموها بطاله مُقنعّه
الحقيقه بعد 12 سنه من التخرج (خريج 95 ) و الإحتكاك بمجالات العمل المختلفه الأشكال و الشركات الخاصه و العامه و المختلفه الجنسيات كمان أقدر أطرح مشكله البطاله في عده نقط رئيسيه من وجهه نظري المتواضعه
النقطه الأولي : العامل المهاري لا يمكن يكون عاطلاً
لازم نعترف إن مفيش عامل مهاري مهما كانت مؤهلاته أو مستوي تعليمه أو ثقافته ممكن يكون عاطل !
بالعكس.....خليك كده عامل مهاري عنده من المهارات لأي شغلانه في الدنيا و نتا هتلاقي الشركات بتخطفك خطف و بتتصل بيك و بتعرض عليك مرتب عالي ونت إللي بتقولهم أفكر كمان !
يعني إيه ؟
يعني البطاله هي إنك تروح تتقدم لأي وظيفه سواء و لا تفتح شهيه من يختبرك !
إن صاحب العمل أو حتى مدير العمل يحس إنك هتكون "عاله" على الشركه و إنك جاي عشان تقبض القرشنات و بس !
لازم تنمي نفسك في أي مجال و بأي وسيله و بكل وسيله
لازم تحس دايماً إنك مابتعرفش حاجه و عايز تتعلم
العبدلله بيحارب حتى الآن في شركته عشان آخد دوره و أتعلم شيء جديد
حتي لو الناس شايفاني كويس ، أنا شايف إني ناقصني معلومات كتير عن حاجات كتير في شغلي
هل إحنا بنحاول نتعلم ؟ ، هل بنحاول نتطور ؟
هل بنتخيل إحنا هنفيد مجال العمل إزاي ولا قاعدين عل القهوه و عايزين نتعين بكره بألفين جنيه ف الشهر ؟؟
أعتقد أي شركه ممكن تخلي عندك فلوس لكن مستحيل تخلي عندك إراده التعليم و التطوّر
النقطه التانيه : نقص ثقافه العمل
الحقيقه دي نقطه مهمه جداً
أنا دايماً بحس إننا معندناش ثقافه العمل
يعني إيه ؟
يعني إسأل أي شاب و قوله عايز تشتغل ليه؟
أول حاجه هايقولهالك : عشان عايز فلوس طبعاً !..............ماشي
أكيد كلنا عايزين فلوس من الشغل لأننا محتاجنها لحياتنا مفيش كلام
لكن هل إحنا بنشتغل عشان الفلوس بس؟
هل حلم أي حد إنه يكوّن المليون جنيه عشان يحطهم في البنك و يصرف من فوايدهم؟؟
على فكره الحلم ده عند شباب و رجاله كتير جداً !
و لا المفروض إننا "نستمتع" بالعمل
إننا نحس "بفايدتنا" في المجتمع و فايدتنا للناس
أنا أعرف واحد ساب الشغل عشان مديره طلب منه يصوّر ورقه و هوا محاسب أدّ الدنيا !!
طب إيه المشكله إنك تصوّر ورقه ؟
إيه المشكله إنك تكتب جواب ؟
إيه المشكله إنك تشتغل في مجال مش بتاعك عشان إنتا مؤمن إن إحساسك بفايدتك أهم من إحساسك بمنصبك؟؟
عشان إنتا عندك إصرار إنك تحسس الناس إن وجودك غير غيابك
عشان إنتا مؤمن إن كل مجال شريف هوا مجال محترم و ليه أهميته و علمه و تفاصيله إللي لازم تعرفها عشان تقدر تنفع الناس بيها
هل إحنا حاسين بده ولا بنروح الشغل كارهينه لمجرد إنه هيدينا فلوس ؟

إسأل كده أي شاب و قوله إنتا مقتنع إن زوجتك أو أختك تشتغل؟....شوف هيقولك إيه
لا عيب مراتي تشتغل .......بس هيا بتساعدني في مصروف البيت هنعمل إيه بس !
لا عيب أختي تشتغل .......بس أهو بتصرف على نفسها !

يعني مفيش إقتناع بأهميه و قدسيه العمل و فيه إقتناع إن البيت إللي فيه ست بتشتغل دا يبقى بيت محتاج

إنما أهو شغل "إضطراري" و خلاص !
هيا دي الثقافه إللي عندنا ، إنما بنشتغل عشان الشغل فايده للمجتمع و لينا و تنميه لمعلوماتنا و شخصياتنا لأ
النقطه التالته : الأمان في العمل
الحقيقه دي مشكله مؤرقه و أخوكم عانى منها كتير جداً
القانون بيقف في صف الشركات الخاصه بشكل يخلي عدم التأمين على العامل أو حتى التأمين الصوري عليه واضع العامل دايماً تحت ضغط عدم الأمان
عايز أتجوز بس خايف يرفدوني ف أي لحظه
عايز أجيب شقه أو أجهّز بس خايف الأقساط مقدرش أدفعها لأن المرتب مش مضمون
و هكذا !
و طبعاً دا بيولد عدم الإستقرار النفسي
و بالتدريج كُره لصاحب العمل "الظالم"
و الكُره للحكومه "الموالسه " مع أصحاب العمل
و هلُم جرا !
النقطه الرابعه : الواسطه و إنعدام تكافؤ الفرص
طبعاً دا الورم المتوارث إللي بيولد الإحباط و اليأس و الكُره للوطن و المجتمع و حتي للناس بينهم و بين بعض
إن واحد كويس بجد و عنده من المهارات ما يؤهله لشغل وظيفه و هوب يبص يلاقي صاحب الحظ و الواسطه لهف الليله !
ممكن الإنسان دا يكون شعوره إيه ؟
و ممكن ينقل الحكايه دي لكام واحد ؟
و ممكن الإحباط يصيب قد إيه من الشباب و يخليهم مجرد قمصان و بنطلونات و جيبات بدون روح و لا إراده و لا تفكير ؟؟
أعتقد إن المساواه في الظلم عَدل
و إن التكافؤ في الفرص حتى لو مكانتش الفرص دي جامده قوي يعني هيخلي مبدأ العدل عند أي واحد
حتي إللي يتعين في الوظيفه دي مستحيل هيعين حد بالواسطه بعد كده لأنه يوم ما ييجي يعمل كده هيفتكر إنه إتعين في الوظيفه دي بمجهوده و مهاراته مش بالواسطه

أعتقد لو الأربع نقط دول قدرنا نحلهم بما فيهم مسؤليه علينا (المهاره و ثقافه العمل ) و مسؤليه على الحكومه (قانون العمل و تكافؤ الفرص)
هيكون عندنا شباب مهاري و عنده ثقافه العمل بيشتغل تحت مظله آمنه و بالتالي عتده إستقرار نفسي في إطار كبير من العداله في المجتمع و مبدأ تكافؤ الفرص

ربنا يستر

07/ 1/2008 ، 07:30 م .. من قبل rodhawp

الموضع كبير جدا وشكله من المشاكل المستعصيه
تحياتى

فعلاً

07/ 1/2008 ، 07:33 م .. من قبل lastdinner

أهو بنحاول يا أخ رفعت نطرح وجهه نظرنا لعل و عسى نفيد أي شاب و عشان مايتقلش علينا قاعدين نعترض و خلاص و مشيلين الحكومه كل همومنا !
أخوك حازم

المهندس / حازم

07/ 1/2008 ، 08:53 م .. من قبل GamalMubarak

تصور ان كل الطاقة الفكرية دى معطلة
عندنا شباب ناضج واعى وقادر على التغير
اظن منتظر فرصه
حضرتك عرضت أسباب فى منتهى الأهمية
وبتمنى لو استمر جهدك بنفس الطاقة دى خايف اقول بنفس الحماس لانه مشهور عننا الحماس المؤقت الوقتى المرتبط بظروف ورغم انه كتير بينفعنا من باب شدى حيلك يابلد و المصرى بيظهر معدنه وقت الازمات يا سلام بقى لو استمر الحماس
عند حضرتك اسلوب سهل مقنعم ومحدد الاهداف
فيك صفات القيادة الحكيمة بتمنى لك التوفيق الاستمرار فى عرض الحلول المقترحه سواء لتدريب الافراد او توعيتهم او حتى اللى ممكن الدولة تقوم به كدور
والطلب الاخير بتمنى انك تضيف هذه الدراسة لمدونتنا لانها هتكون اضافة مهمة وجيدة للى بيتابع معنا
شكراً لجهدك

اصبت لب الموضوع

07/ 1/2008 ، 09:57 م .. من قبل popan

اخى حازم اشكرك على طرحك للموضوع معك حق لازم نحب شغلنا فى مقولة بتقول حب ما تعمل حتى تعمل ما تحب. بس الامان فى العمل و الواسطة مشكلات اعتقد انها صعبة و محتاجة وقت طويل عشان تتغير بس طبعا مش مستحيل وفى النهاية اشكرك على طرحك للموضوع واسبابه بشكل جيد . اختك هبه

الأستاذ جمال مبارك

07/ 1/2008 ، 11:07 م .. من قبل lastdinner

أشكرك جداً على الإهتمام برأينا أولاً و بالإثناء الجامد إللي أنا طبعاً ماستاهلوش دا
دي وجهه نظر رجل شارع بسيط عاش و إتمرمط لحد ما درس أخطاؤه نوعا ما و إكتسب شويه خبره مش أكتر
طبعا أنا متأخرش بأي شيء و هضيف المدونه البسيطه دي لمدونتكم لعل و عسى أي أخ أو أخت يستفيد منها و الواحد يحس إنه عمل حاجه مفيده في حياته
أما الحماس أو الجهد إن شاء الله موجودين طول مانحس إن فيه "إنتاج" و فايده للناس زي ما الحماس و الجهد موجودين في عملنا لأننا بنشوف إزاي بنقد نفيد شغلنا
لكن كمان في شغلنا إتعودنا إن لو الكلام كتر و الإنتاج قل يبقي الأمور محتاجه إعاده ظبط و تقييم
أخوك حازم

الأخت هبه الغاليه

07/ 1/2008 ، 11:11 م .. من قبل lastdinner

معلش كل حاجه محتاجه وقت لكن نفسي أعرف وقت قد إيه و الشباب مطلوب منه يعمل إيه و النتيجه إيه ؟
علينا مسؤليات و الحكومه مسؤليات و نخلص بأه !
وربك مع الغلابه
أخوكي حازم

عيش حياتك و إخلع مساميرك !

06/ 6/2008

10:35 م

عايزك تجيب كيس زباله حلو كده و كبير و تعالى اقعد جنبي و قولي ............

إيه إللي مضايقك يا أخي؟

مراتك مطلعه عينك و هارياك مشاكل ليل نهار هيا و العيال ؟

طلّلع مسمارهم من دماغك يا أخي و أقعد اتفرج على نانسي و هيفاء و إشرب نسكافيه ولا يهمك

سيبلها البيت و إطلع إسهر مع إصحابك و إضحك و روِّش و عيش حياتك

إيه تاني؟

مديرك ف الشغل ولا زمايلك بيضايقوك و ضاغطين على أعصابك ؟؟

ناولني المسمار دا كمان........أهو رميتهولك ف الزباله

إهتم بشغلك بس عشان دا أكل عيشك و إللي بيخليك تخدم الناس و تكون إنسان مُنتج و هوا المكان الوحيد إللي

بيديك فلوس تعيشك و تعيش عيلتك لكن أي مضايقه فيه إرميها ورا ظهرك و إنساها أول ما تطلع منه

ها.......قولي إيه تاني مضايقك؟

بتحب واحده مطلعه عينك و عايشه ف الدور ؟؟

هاااااااات أم المسمار دا عارفه رزل و تخين..أااااااااااااهوه يا سيدي ولا تزعل نفسك

إدلقها و طلع مسمارها من قلبك و إشتري دماغك

بكره تلاقي إللي تقدرك و تشاركك همومك و أفراحك و تحبك بجد مش تحب نفسها بس !

قولي متنكسفش...........إيه تاني مزعلك كده و جايبلك إحباط ؟

الفلوس مزنقه معاك و عايز تجيب حاجات ضروريه كتير ؟؟..................ماشي

أفتكر كيس الزباله لسه فيه مكان

سهله قوي قولي كده إنتا محتاج الفلوس تعمل بيها ايه؟

شقه؟............يا سيدي أجَر شقه قانون جديد بدل التمليك

عربيه ؟..........إسألني أنا عن العربيات و أرفها و من الميكانيكي للكهربائي لبتاع العفشه يا قلبي لا تحزن

الله يرحم أيام المشي و الأتوبيسات و التاكسيات لو العمليه منعنشعه

عايز تصيف؟

و مالو ......روح يا سيدي جمصه ولا يومين ف الإسماعيليه أو فايد مش لازم المعموره يعني !

عايز تاخد كورس كمبيوتر ؟

دا الكورسات دلوقت بقت على قفا مين يشيل و ب 30 جنيه ولا يكون عندك فكره

ها..........قولي بس مالك كئيب ليه كده ؟...إيه تاني مضايقك ف حياتك ؟؟

مش لاقي شغل أصلاً ؟..............بسيطه قوي يا أخي خضتني !

هات المسمار دا صغنن كده و لذيذ....إرمي في الزباله ونا أقولك تعمل إيه !

غير التدوير على الشركات ممكن قوي تفتح النت ساعه بإتنين جنيه ف أي سيبر و مواقع العمل بقت متعدش

إعمل C.V محترمه كده و جذابه و حطها على فلاش ولا CD و إديها بقى...إبعتها لأمه لا إله إلا الله فاكسات و إيميلات و إن شاء الله ربنا هيوفقك

إنسى يا أخي إنسى و ريح بالك........و عيش حياتك بأه...إنتا هتعيش كام مره بس قولي دي هيا مره واحده!

الحب ف القلب.....زي عضه الكلب !

06/ 4/2008

01:44 م

الحب جميل للي عايش فيه .........جايز !
الحب نار............................ينفع ف الشتا !
الحب مشاكل لذيذه ..............مش قوي !
الحب توأم الجمال............عمرك شفت أغنيه حب لواحده وحشه؟؟
الحب طرفين موجب و سالب.......مش دايماً !
الحب تعبير مُهذب لأغراض غير مُهذبه......غالباً!
الحب زي المعركه محتاج تخطيط و تكتكه........معقول !
الحب عذوبه و عذاب...................لازم !
الحب زي الحرب بدايته معروفه و نهايته غير معروفه........حسب الظروف !
مرايه الحب عاميه............قوي !
الحب جهل ممتع و الكراهيه معرفه موجعه.........سُنه الحياه !
الحب ف القلب زي عضه الكلب.........أكيد !

milestones

06/ 1/2008

05:08 م

الmilestones دي مهمه جداً في الحياه بس عايزه شويه تركيز

هيا ترجمتها بالعربي الأشياء المُعَلَمه يعني مثلاً لما تيجي توضح موضوع أو تشرح قضيه و مش عايز إللي قدامك "يتوه" منك تقوم تعمله الموضوع عباره عن نقط مُرقمه أو غير مُرقمه

مثلاً

نقطه 1 كذا و كذا

2 كذا و كذا & 3 & 4 ...........إلخ

أو تعملها نقط غير مُرقمه

مثلاً

كذا و كذ
كذا و كذا................إلخ

طب و الكلام دا مُفيد في إيه ؟..............اقولك

الكلام دا مفيد جداً في حالات كتير لو عملته مع نفسك

إزاي ؟

لو عملت الكلام دا مع نفسك في تاريخ حياتك مثلاً تلاقي نفسك عملت في السنه دي كذا و السنه دي كذا و ممكن توصل منه إنك مثلاً ضيعت وقت كتير هنا و إستثمرت وقتك هنا...و هكذا
لو قلت لنفسك مثلاً "أنا بجيد إيه من مهارات الحياه" و لقيت نفسك عملت ثلاث نقاط ووقفت ، هتقول يا خبر أبيض يعني أنا معرفش في الحياه غير الفُرجه على التليفزيون و توليع السجاير و الشات عل النت؟؟
لو عملت الmilestones دي في موازنتك الشخصيه (معاك كام و عايز إيه و إيه إللي ليه الأولويه" هتقدر تحدد أهدافك الماديه و متحسش إن موازنتك ضاغطه عليك
لو جربت تعمل ال milestones دي في الأشياء التي تضايقك بالحياه ممكن جداً تحصر الأشياء دي و ممكن توصل لحلول ليها لكن طول ما ها "مبعتره" كده عمرك ما هتقدر تحددها و بالتالي عمرك م هتتغلب عليها !
لو إتعودت في طريقه شرحك لمشكله عندك إنك تحطها في نقط هتلاقيها أسهل كتير عليك في الشرح و أسهل كتير على الناس في الفهم
و هكذااااااااااا

عجبتك ال milestones ؟؟

المرأه الجميله !

05/28/2008

09:35 م

المرأه الجميله.........تعرف إنها جميله فإحترسها !
المرأه الجميله........بضاعه رائجه فإلحقها !
المرأه الجميله.......الحب كله فإغتنمها !
المرأه الجميله......دلوعه فإسعد بها أوقاتك !
المرأه الجميله......طلباتها كتير فاخليك مُطيع !
المرأه الجميله.....كأس له متنافسين كُثر فإجمد يا بطل !
المرأه الجميله....نظرتها سهم و مشيتها لغم و كلامها حمم فا إمسك نفسك !
المرأه الجميله.....زعلها حرام و نفاقها حلال فإصبر يا أخي !
المرأه الجميله.....جنه لعينك و نار على قلبك و صداع ف راسك و عاصفه على جيوبك فا الله يرحمك كنت ابن حلال و الله !

النقطه الجميله !

05/27/2008

09:37 م

كل موضوع ، كل كلام ، كل "شيء" سواء كان آله شارع كتاب مبنى طريق ....أي شىء....فيه نقطه جميله !

و النقطه الجميله أقصد بيها "النقطه الفعّاله" أو النقطه الهامه التي يجب أن يذهب النظر إليها و أن نتحسس سلامتهاو نتأكد من معرقتنا الكامله لها !

و الحقيقه إللي تفوته النقطه الجميله في أي شىء أمامه أو يتعامل معاه يفوته الكثير و يسير بالطريق الخطأ و غالباً ما يدفع ثمن عدم معرفته بالنقطه الجميله غالياً

و النقطه الجميله مش شىء محدد 100% لكن غالباً ما يتفق حوله الناس أو جمهور المتعاملين مع الشىء ، لكن ممكن جداً يكتشف إنسان عبقري نقطه جديده أو طريقه أخرى لمعاجه النقطه الجميله نفسها

كلام غامض شويه؟؟

طيب أمثله

عشان تركب عربيتك و تسافر بيها هتبص بسرعه على إيه؟

مش معقول هتجيب كتالوج و تروح للميكانيكي يبص لك عالموتور و الشاسيه و الكهربائي يبصلك عل الضفيره و الإسبراتير و..........إلخ ! يبقى هتسافر الصيف الجاي بإذن الله !

النقطه الجميله إنك هتراجع عل العجل لو محتاج نفخ و زيت الموتور و مياه الردياتير و البطاريه و الكاسيت عشان يسليك ف الطريق ! دي كلها حاجات متاخدش منك ربع ساعه بالكتير نص ساعه

لو هتشتري أو هتأجر شقه معقول هتجيب متر و تقيس هنا و هنا و تشوف المداخل و المخارج...إلخ ؟؟

النقطه الجميله إنك هتشوف المنطقه و "هتحس" بوسع الشقه و تشوف تقسيمه الغرف و تشوف الview , هتشوف المياه و الكهربا و الغاز واصلين ولا لأ ............و ألف مبروك !

لو ماسك جرنان هتقرأه.........طبعاً فيه ناس غاويه تقرأ كل سطر.....كويس ، بس معقول بعد ماتخلص حد يسألك على خبر مهم في الجرنان متعرفش؟؟ (النقطه الجميله)

لو ساكن في منطقه....معقول إنتا أو زوجتك أو ولادك حد منهم يتعب فجأه و متكونش عارف أقرب دكتور أو مستوصف جنبك؟؟ (النقطه الجميله)

معقول عشان تفتح التلفزيون أو الكمبيوتر تقعد نص ساعه و بعدين تكتشف إن سلك ال power مش واصل؟؟

مع أطيب التمنيات بحياه أجمل مع النقطه الجميله !

الأسعار........و الإنتحار !

05/26/2008

06:48 م

.. التعليقات 3

بجد حاجه وسخه و مفيش أي لفظ تاني أأدب من كده ممكن أستخدمه !

يعني العمليه بقت مكشوفه طحن صراحه !

الريس يطلع في الخطاب الأسود عليه و عل إللي جابوه و يقولك "أنا قلت للحكومه تزود المرتبات ، قالولي مفيش موارد قلتلهم مليش دعوه ، قالولي 15 % قلتلهم 30% قالولي طب 20% طب 25 % قولتلهم لآلآلآ 30%"

هاااااااااااااااااااا تصفيق حاد للريس ياد منك ليه ليها ليهم !

تاني يوم زياده في أسعار الوقود بأنواعه .......و الحدق يفهم !

زياده في الوقود يعني زياده ف كل حاجه حضراتكم .لأن ك حاجه الدنيا بتتنقل............نقوم نقول إيه إحنا ؟؟

يا سلاااام..شوفوا حنيه الريس .......و شوفوا الحكومه الدزمه بنت الدزمه إللي معندهاش شفقه ولا رحمه !

يعني السياسه المعتاده...النصر و العلاوات و المشاريع للريس ...و الهزيمه و صفر المونديال و توظيف الأموال و توشكى و الضرايب و زياده السعار للحكومه الكُخه الوحشه إللي معندهاش ضمير !

و نوّام البرطمان قصدي نواب البرلمان فين ؟؟........تصفيق حاد و موافقه عل الأسعار !

ياولاد ال........

يعني مفيش بني آدم يحس بمعاناه الناس و الشعب دا ؟؟

حتى لو النواب دول مرتاحين فين حقوق أبناء الدوائر إللي إنتاخبوكوا يا ولاد الدايرررررررررره ؟؟...هه؟؟

مفيش "دكر" يقوم يقف في نص المجلس دا و يقول "بصوا يا حكومه و بصّ ياريس إحنا يا عم مشكريين قوي مش عايزين علاوتك المنيله دي بس خلّوا الأسعار زي ماهيا " ّ!

مفيش رجاله؟..........كل الرجاله راحت ف الحرب ؟؟

و الناس دي هتعمل إيه؟؟

دانا بقبض شهرياً ألآف الجنيهات و مش عارف أعيش أومال إللي بياخد 600 و لا 700 جنيه (مش هقول 200 و لا 300) و عنده عيال و بيت و زوجه عايش يعيشهم و يعلمهم و يداويهم يعمل إيه؟؟

خلاص الرحمه إنعدمت و الوصوليه بقت هيا الطريق ؟؟

دوس على أهل حتتك و اهل دايرتك و إصحابك و إخواتك و صفق عشان الحكومه ترضى عنك و تديك زياده ؟؟

إلهي يجيلكوا و يحطّ عليكوا من أول ريسكوا مروراً بحكومتكوا و نوابكوا و نهاياً بأصغر موظف يرفع إيده بالتحيه لكلب من كلابكوا

داخلك قاطره بشريه !

05/24/2008

04:53 م

تخيل كده جهاز كمبيوتر من أحدث الأنواع متفكك كل جزأ في حته

تخيل عربيه أحدث طراز كل حاجه فيه لوحدها

تخيل ورق مهم جداً كل ورقه مرميه علي مكتب بدون ترتيب

تخيل إن كل دي حاجتك................تقدر تستفيد من أي حاجه فيها و هيا على حالها كده؟؟...................طبعاً لأ

أومال ممكن تستفيد من الحاجات بتاعتك دي إزاي ؟؟..............سهل قوي...........إنك "تجمعها" و ترتبها و "تشغلها" !

إنتا بالظبط زي الحاجات دي........لو زهقان......لو قرفان..........لو حاسس بالخيبه و العجز.......قدامك حل واحد

إستدعي قاطرتك البشريه.......إرادتك........تلاقي الدم جري في عروق مخك و عروق عضلاتك و نفخ العزم و التحدي في نفسك الخامله

تلاقي كل شيء إتبدل و إتغير

معلوماتك المُتناثره إتجمعت و أصبح ليها شكل و ليها فايده

أفكارك المشتته أصبح ليها هدف واضح

كسلك و تراخيك أصبحوا نشاط و همّه و عمل دؤوب

تُفاجيء بنفسك بدل النومه على السرير أو قدام الدش بقيت إنسان كله إراده و عينيه بتلمع من النشاط و الهمّه

هتلاقي نفسك بدل ماكونت عربيه مفككه موتورها بايظ بقيت إنسان مصحصح تجره قاطرته البشريه العظيمه......الإراده !

العرب......و الجَرب !

05/20/2008

06:48 م

.. التعليقات 4

منفعل : يا أخي تصدق بأه العرب دول جَرب فعلاً !

عاقل : لا حول ولا قوه إلا بالله...ليه يا سيدي؟؟

منفعل : بقولك إيه متعمليش فيها إنتا العاقل ونا المجنون ، لا يا حبيبي أنا عاقل أكتر منك و بقول رأيي دا عن تجربه مش أي كلام ، أنا إشتغلت في الدول العربيه سنين واقدر أقولك فعلاً إن العرب دول جَرب و بالفُمّ المليان كمان !

عاقل : طب يا سيد العاقلين فاهمني ليه ؟

منفعل : أولاً دول أجدع ناس تاكل حقك من غير ذمّه ولا ضمير ولا دين و ثانياً دول أكتر ناس كدّابين في الدنيا و علي فكره أنا في شغلي عاملت العرب و الأجانب و دول شرق أسيا كمان ، و أقدر أقولك إن الكدب و قله الضمير دي في الجينات العربيه نفسها !

عاقل : يا سيدي مش معني إنك قابلت واحد أو إتنين أو حتى مجموعه إنك تقول كده علي العرب كلهم و دول إخواتك برضه ....عيب !

منفعل : بلا إخوات بلا أرف ،و متقوليش واحد أو إتنين ولا حتى مجموعه و متقوليش عيب ، العيب إنك تكون جاهل و مش عارف إنك جاهل ، إنك تكون أحمق و متخلف و فكرك إن الغرب الكفره دول ربنا سخرهم ليك إنتا يا كسلان يا عديم المنفعه عشان يخدموك ! ، العيب إنك تكون ناكر للجميل للي علمك و فَهمك و خلاك بني آدم ، إنك تكون ناكر للجميل حتى للغرب إللي إكتشفلك البترول و خلاك غني و إدّاك العلم و التكنولوجيا ونتا قاعد علي حيلك

عاقل : إنتا جبت الكلام دا منين بس؟؟

منفعل : منتا نايم في العسل يا عاقل بيه ، إنما أنا روحت و جيت و إتمرمطت ، شوف العرب بيعاملوا المصري إزاي عندهم بكل تعالي و إحتقار عشان يطلعوا عليه النقص إللي عندهم ، شوف إزاي فرقه كامله المفروض إنها موسيقيه طالعه تشتم مصر و المصريين و تقول عليهم الشحاتين و الزبّالين و الحراميه ، شوف كميه الرشاوي إللي في الدول العربيه ، يا راجل دانا شوفت واحد سعودي بيشرب بطريقه سنه النبي (ص) و بياخد رشوه ! ، شوفت في اليمن و ليبيا ناس بتاخد رشاوي و توقع على إيصالات مايهمهاش لأن كل البلد كده !

عاقل : يا سيدي أولا الفرقه إللي بتقول عليها دي إتحبست من الملك السعودي نفسه يعني تعتبر حاله شاذه في السعوديه نفسها ، أمّا الرشاوي فا دي مع الأسف فعلاً ظاهره عربيه و ياريت تكون fair و تقول إنها في مصر كمان ! ، و بعدين ماهي مصر برضه بلد عربي !

منفعل : مانكرش إن المصريين فيهم كتير ، لكن مصر مش بالأساس عربيه ، و بعدين إحنا يا أخي برضه بنحاول نتعلم نتطور

عاقل : و حياتك إنتا إحنا فينا ناس متعجرفين و جاهله و كدّابين كتير قوي

منفعل : طب منا بقولك من الصبح.......................يبقي العرب إيه؟؟

سر النجاح........الجانب الآخر !

05/16/2008

11:21 م

كلام كتير إتقال عن أسرار النجاح ، و كتير من العظماء و القاده و المخترعين إتسألوا السؤال دا

لكن مارحش من ذهني أبداً كلمه القائد الإنجليزي مونتجمري (قاهر روميل) إللي قال

"سر النجاح ...معرفه ما يدور علي الجانب الآخر "

الحقيقه الجمله قصيره و واضحه و مفيده !

و الموضوع مش معناه في الحرب بس إنك تتجسس علي عدوك............أبداً

لما طبّقت الجمله دي في جميع الحالات لقيتها فعلاً سليمه ...إزاي ؟؟

عشان تنجح في دراسه لازم "تذاكر".يعني تعرف ما يدور بالكتب و العلم (الجانب الآخر)

عشان تنجح في عمل لازم تفهم شغلك أولاً و تفهم زمايلك و مديرك و تعرف عايزين منك إيه و إيه إللي يهمهم و إيه إللي يزعلهم و هكذا........(الجانب الآخر)

عشان تنجح في علاقاتك لازم تفهم إهتمامات الناس إللي بتعمل معاها العلاقات دي.........(الجانب الآخر)

عشان تنجح في إصلاح سيارتك أو تجديد بيتك لازم تحدد عايز تعمل إيه و عشان تحدد إنتا عايز إيه لازم تعرف

العيب فين و جاي منين و إيه وسائل الإصلاح أو التجديد المُتاحه ................(الجانب الآخر)

عشان تنجح في شراء شيء جديد تحتاجه لازم تحدد مواصفات الشيء ده و عشان تحدد المواصفات إللي إنتا عايزها لازم تعرف إيه الأنواع الموجوده بالسوق و إيه هيا مميزات و عيوب كل نوع ................(الجانب الآخر)

بإختصار أولي خطوات النجاح .....العلم بالجانب الاخر !

الإضراب و كشف الضباب !

05/14/2008

08:46 م

.. التعليقات 4

الحقيقه رغم إن الإضراب في 4 مايو و 6 أبريل أثاروا مشاعري لكن مقدرتش أعبّر عنه وقتها لأني كنت سعيد بيه و كنت بتأمله و أفكر فيه

هل فعلا يا جدعان الشعب المصري مامتش؟؟

إنتو عارفين أنا كنت دايماً أهزر و أقول توظيف الأموال نهبنا و نواب القروض و المخدرات قشّطونا و الأسعار عمّاله تغلي و الحكومه عمّاله تسرق و الريس كابس علي نفسنا و إبنه جاي يكمّل علينا و يورثنا.......كل دا و الشعب فين ؟؟ عارفين الشعب فييين؟؟..............في الحمام جايز أو راحت عليه نومه !

للدرجه دي كنت فاقد الأمل في الناس......فين الناس ؟....ليه مابتتكلمش؟.....ليه مابتعبرش؟؟؟

يانهار إسود يا جدعان !....دا نيجريا و السودان و اليمن بقي عندهم إنتخاب و ديموقراطيه و أكتر من ريس مُرشّح من قبلنا و مجلس شعب حقيقي مش هتيّفه ولا صقيّفه !........يعني لا بنقول أمريكا ولا أوربا !

دا قطر بقي عندهم قناه الجزيره ، قناه بتنقل الأخبار حقيقيه مش ملونه بألوان الحكومه و الريس و التعليمات و الأمن القومي و الكلام الفاضي إللي مسح عقول الناس و عمل ضباب علي كل المعلومات إللي المفروض توصلهم ! ، قناه بتنقل الخبر حسب أهميته الحقيقيه مش عشان بتاع الريس أو الحكومه !

يا جدعان دا البلاد العربيه بقي فيها مظاهرات عشان الغلاء و عشان تعيين وزير حرامي أو عشان مسئول خد رشوه !

برضه لا بنقول أوربا ولا أمريكا !

الله !........أومال إحنا ساكتين ليه؟.......خاضعين ليه؟؟.........خايفين من إيه؟؟

إقتصادنا تحت الأرض و خدنا صفر في الرياضه و في السياسه بناخد علي قفانا و المصري أكتر واحد متهان و ممسوح بيه الأرض في البلاد العربيه !

باقيين علي إيه؟.........و خانعين لمين ؟.........و هيعملولنا إيه أكتر من الوكسه إللي إحنا فيها ؟؟

أنا فرحان بالإضراب و مع الإضراب و مع أي إضراب أو مظاهره ضد الحكومه و ضد الفساد و ضد الغلا و ضد التوريث

مش مهم الناس زعلانه من إيه ولا بتقول إيه ولا بتعمل إيه !

المهم إن الناس لسه واعيه و لسه فيها الروح..........و ياروح مابعدك روح

و الحمدلله إن الشعب صحي من النوم.......و طلع من الحمّام !

فن النهايه !

05/13/2008

08:40 م

كتير بنبتدي حاجه بمنتي الحماس ، بمنتهي الدقه و التخطيط ، بمنتي الإصرار
شويه تبدأ المشاكل في التطبيق العملي ، تبدأ مشاكل التنفيذ تبدأ مشاكل ماكنتش في الحسبان
و بمرور الوقت أكتر يبدأ التعب يحلّ ، يبدأ الإرهاق و دخول الزهق
و بمرور وقت أكتر في منتصف العمل يبدأ التركيز يقل ، و الزهق يزيد و المشاكل تكتر
و مرور وقت أكتر و أكتر قرب نهايه العمل تلاقي جبال من المشاكل و العوائق و الزهق ، و تلاقي بواقي حماس و بواقي طاقه و تركيز
بمعني تاني منحني الأداء يبدأ مرتفعاً ثم يبدأ في الإنخفاض
بينما منحني العمل و الضغوط و المشاكل يبدأ منخفضاً ثم يرتفع
و الإنسان الذكي الصبور المتحكم بأعصابه هوا إللي يقدر يقسّم جهده و فكره و صبره بين البدايه و الوسط و النهايه
يعني لا يبدأ بكامل حماسه و طاقته ولا يفتر بوسط العمل ولا يصل بنفسه إلي قمه التعب و الغضب و الزهق بالنهايه
و بالرغم أن النهايه غالباً تحتاج جهد قليل لأن العمل يكون قد تم أو أوشك ، إلا أنها تحتاج فن و حكمه في "غلق" العمل
كيف "تغلق" أي عمل تبدأه بمهاره و إتقان و دون مشاكل و في الوقت المناسب و بأقل مجهود و كما تريد تماماً !
كيف تسطيع ن تحافظ عي ما حققته من مكاسب و تقدم بالعمل علي مختلف مراحله حتي النهايه و تترجم هذا كله إلي نهايه مُحكمه سليمه !
شوف مثلاً حتي في الكوره ممكن فرقه تبدأ تاتا تاتا و تفاجيء إن أداءها يرتفع مع ماتشات البطوله و أهميتها حتي تصل للنهائي و تكسب كمان !
إيطاليا في 1982 ، الأرجنتين في 1986 و 1990 ، البرازيل في تصفيات 2002 كانو بيقولوا مش هتوصل حتي كاس لعالم ،ووصلت و فازت بيه !
حتي مصر في الأمم لأفريقيه 2008
شوف السبّاحين العالميين و العدّائين و مهاره تقسيم الجهد بالسباقات
لاعب الشطرنج العالمي إزاي ينهي المباراه بكل سلاسه و يخرج فائز بها دون أخطاء
البدايه تحتاج حماس....و الوسط يحتاج لجهد و إصرار.....أما النهايه تحتاج لفن !

المُبادر....و القطيع !

05/ 5/2008

08:44 م

.. التعليقات 1

فيّ واحد تقابله مشكله أو عايز يعمل حاجه معينه أو يشوف الناس بتعمل حاجه بطريقه معينه يبدأ "يفكر".."يحلل" ..."يبتكر".."يجرب" إللي فكر فيه
ممكن تفكيره يكون صح و ينفع يتنفذ فعلياً....و ممكن يكون تفكيره مش صح 100% من أول مره ، يبدأ يصححه و ينقحه لحد ما يوصل للصح
و الصح دا مش لازم يعني يكون "إختراع" ولا حاجه !
ممكن يكون حاجه بسيطه ..طريقه أسهل في شغله لعمل معين....طريق مختصر لطريق عمر ما حد فكر فيه....أكله جديده...ترتيب مختلف لخطوات الناس بتعملها كل يوم
المهم إن فيه حاجه لفتت إنتباه الشخص دا أولاً
و شغّل دماغه ثانياً
وكان واثق في نفسه و حاول "يجرب"ثالثاً
و كان معندوش خوف من الفشل أو من "كلام الناس"رابعاً
و طوّر نفسه و تفكيره لما لقي صعوبات واجهته في محاولات تطبيقه لفكرته خامساً
و كان عنده الإراده و قوه الفعل و "ماكسلش" يشتغل سادساً
دا هوا الإنسان "المبادر"!
إللي ينطبق عليه القول ...."هؤلاء المجانين الذين يذهبون لأماكن لم يطرقها الناس يجدون شمساً لم تُدفيء الناس من قبل"
دا فئه المخترعين و المطوّرين و القاده و الباحثين
دا فئه كل إنسان خارج "القطيع" بيشوف بعين مختلفه و عقل مفكّر و إراده من حديد
دا فئه النافعين للناس و المقدمين كل يوم لجديد
أمّا الناس العاديين أو زي ما بيسموهم "القطيع" هم الناس إللي دايما بتعمل زي الناس ما بتعمل
بدون تفكير أو وعي
و لو صادفت و فكروا معندهمش ثقه يجربوا
و لو فكروا يجربوا خافوا أحسن يفشلوا
و لو جربوا ماكنش عندهم القدره علي التطور ولا الإراده علي الفعل
إللي ينطبق عليهم القول ...."الخوف من الفشل لابد أن يجلب الفشل"
تحب تبقي مين فيهم؟؟

إرفع رأسك يا أخي !

05/ 3/2008

09:02 م

.. التعليقات 3

حاسس إنك ضعيف ؟...حاسس إن الظروف أقوي منك؟
حاسس إن "الدنيا معاكساك"؟؟....إنك مش واخد حقك؟
أو هوا دا حقك؟ ..و دا مقامك؟.. و دي قدراتك؟؟
حاسس إن الناس حواليك ركبوا السريع و إشتروا شقق و فيلل و ركبوا العربيات و إتجوزو و خلفوا ونتا محلك سر؟؟
حاسس إنك لازم تعمل حاجه؟....كويس قوي
لكن حاسس إنك معتز بنفسك و دا سبب فقرك و بؤسك ؟
حاسس إن لازم "تطاطي" شويه عشان تكسب شويه؟
بتقول لنفسك أهوه...أطاطي شويه و تكسب الناس شويه و تكسب منصب شويتين و تكسب فلوس تلات شويّات !
أوعي ّ!
أوعىّ تطاطي ولا تذل نفسك
أوعىّ تنحني للريح إن كانت ريح ظلم
إن كانت ريح ضد مبادئك
إن كانت ريح ضد ضميرك
أوعي تخلّي نفسك في يوم من الأيام تبص لماضيك بإحتقار
أوعي تخلي نفسك في يوم من الأيام تشك في القرش إللي معاك إن كان حلال ولا حرام
صدقني عزتك بنفسك و ثقتك في ضميرك أغلي من كنوز الدنيا
صدقني كلمه "الراجل داإبن حلال "من ست غلبانه أو عامل بسيط معاك في الشغل أغلي من اجدع كرسي ممكن تقعد عليه بالغش و التدليس و الحرام و النفاق
صدقني لو بعت نفسك و "طاطيت"مش هتاخد حتي إللي إنتا كنت عايزه!

صدقني

البطوله تفرز البطل !

05/ 2/2008

08:27 م

.. التعليقات 1